Un total de 60 persoas de tódalas idades participaron no “I Camiñares a Santiago 2008”, que organizou a entidade Bimares en colaboración co Concello, e que se desenvolveu ao longo do presente mes de abril. Os peregríns fixeron en catro etapas o Camiño Inglés dende a vila de Ares, saíndo o domingo 6 de abril ás oito da mañá e chegando a Santiago de Compostela o 27 do mesmo mes.
Tódolos participantes, segundo informaron dende a organización, foron monitorizados en todo momento por seis persoas a pé, tres bicis e un furgón de seis prazas de apoio.
En total, foron cen os kilómetros que percorreron a pé os peregríns, en etapas de 25 (Ares-Viñas, o domingo 6 de abril), 24 (Viñas-San Paio de Vilacova, o sábado 12 de abril), 27 (San Paio de Vilacova-A Baxoia, sábado 19 de abril) e 24 kilómetros (A Baxoia-Santiago de Compostela, o pasado domingo, día 27). Cada unha das etapas desenvolveuse en sete ou oito horas, combinando a andaina con outros momentos de lecer e de confraternidade.
O éxito desta iniciativa, tanto no que se refire á participación como ao propio desenvolvemento da actividade, sumado á colaboración do Concello de Ares, son fundamentais para que Camiñares teña continuidade en vindeiros anos. De feito, o mes de abril será a partires de agora para Bimares o da paregrinaxe a Compostela dende Ares.