Mentres as obras no segundo edificio das Escolas do Lago avanzan a bo ritmo, o Concello recibiu a pasada semana unha excelente noticia: a concesión dunha subvención de 46.000 euros para a renovación do patio.
A axuda conseguida, que foi tramitada polo Concello ante Turismo da Xunta a través dos Fondos Europeos Next Generation, permitirá levar a cabo unha actuación por valor de 51.000 euros, asumindo a administración local o importe restante. A intervención permitirá o empedrado do chan do recinto exterior, e tamén do caleixón lateral para mellorar a accesibilidade.
As Escolas do Lago, inauguradas en 1955 e deseñadas polo recoñecido arquitecto Rodolfo Ucha, foron obxecto dun profundo proceso de renovación por parte do Concello de Ares, co obxectivo de preservar o seu valor histórico e mellorar o seu estado de conservación. A primeira fase de renovación realizouse no primeiro edificio, cunha intervención completa que incluíu a rehabilitación de cubertas, tabiquería interior, pavimentos, instalacións eléctricas, aseos ou pintura, entre outros aspectos.
Posteriormente, levouse a cabo a rehabilitación do peche do conxunto das Escolas, cun investimento destinado á rehabilitación do muro perimetral e a mellora da accesibilidade de todo o conxunto, eliminando as barreiras arquitectónicas existentes. Actualmente, están a executarse as obras de renovación do segundo edificio, cun investimento de 273.073,06 euros, que incluirá melloras similares ás realizadas na primeira edificación, co obxectivo de completar a rehabilitación integral desta importante infraestrutura histórica.
A recente subvención obtida polo Concello permitirá levar a cabo a renovación do patio, un espazo emblemático da antiga escola de nenas que forma parte do conxunto arquitectónico. Esta intervención incluirá a substitución do pavimento existente de formigón por outro novo con lousas de granito, e ademais realizarase a pavimentación do caleixón da entrada lateral para unha mellor conexión e accesibilidade co exterior, utilizando a mesma tipoloxía de materiais.
Desde a concellería de Urbanismo destacan que todas as actuacións realizadas poñen de manifesto o compromiso do Concello coa conservación do patrimonio cultural local e a mellora das infraestruturas e espazos públicos. A concelleira Olimpia Marcos destacou que “a consecución desta axuda supón o paso definitivo para completar a recuperación das Escolas do Lago, un proceso no que o Concello implicouse constantemente na procura de financiamento e co que se culminará a súa recuperación total como espacio cultural e socio comunitario”
