O 23 de febreiro, os participantes achegaranse até a beleza natural de Chanteiro, incluíndo unha parada en Punta Segaño, cunhas vista inmellorables de Ares. O itinerario será de 10 quilómetros cun prezo de 5 euros.
As persoas empadroadas en Ares poderán inscribirse a partir das 14:00 horas deste martes, 4 de febreiro, na web institucional ata o día seguinte na mesma franxa horaria (14:00 h.), dando prioridade así na reserva de praza.
Posteriormente poderán facelo as non-empadroadas na localidade, ata o 15 de febreiro ou, de darse o caso, o esgotamento das prazas habilitadas.
A Concellaría de Deportes vén de anunciar hoxe a posta en marcha do proceso administrativo da próxima ruta do SendAres, o programa de sendeirismo do Concello para redescubrir o patrimonio natural galego.
Este martes, 4 de febreiro, a partir das 14:00 horas e a través da páxina web www.concellodeares.gal abrirase a inscrición telemática para o seu quinto percorrido ás persoas empadroadas en Ares. Estará operativa ata o día seguinte, 5 de febreiro, na mesma franxa horaria, momento onde se abrirá a reserva de prazas aos non-empadroados/as na localidade.
Será a beleza da costa de Chanteiro e do seu areal os que cobrarán relevancia neste quinto itinerario. Os sendeiristas iniciarán a ruta no Centro Cultural Outeiro e dirixiranse cara o sendeiro da costa para chegar a Punta Coitelada, a praia de Chanteiro e Punta Segaño, onde se despregan ante os ollos unhas vistas inmellorables do litoral do municipio aresán. Logo se retornará ás inmediacións do C.C. Outeiro.
O percorrido desenvolverase ao longo da xornada do domingo, 23 de febreiro, cunha distancia aproximada de 10 quilómetros e unha dificultade MEDIA-ALTA. O prezo é de 5 euros e inclúe servizo de guía e seguros. Saírase a pé ás 9:00 horas e finalizará o percorrido ás 13:30 horas.
A Concellaría de Deportes asignou 30 prazas para a actividade que se cubrirán por orde de inscrición, primeiro empadroados/as nunha marxe de 24 horas e posteriormente non-empadradoados/as, ata o 15 de febreiro ás 23:59 h. ou, de darse o caso, ata o seu esgotamento.
