O Concello organizou onte mesmo dous actos informativos ao pé das illas de compostaxe comunitaria situadas nas urbanizacións de Mariña do Pombal e de GranxAres para motivar á veciñanza a empregar este sistema de marcado carácter ecolóxico. Durante as sesións, afondouse no funcionamento das propias illas comunitarias e nos residuos que se poden depositar nelas, amais de explicar os beneficios ambientais e económicos que se derivan do proceso de compost.
Nos dous actos informativos tamén estivo a concelleira de Medioambiente, Lucía Blanco, que agradeceu a participación dos veciños e veciñas nos eventos e salientou a importancia de “recuperar unha tradición asentada no rural galego a través das illas comunitarias, mais nesta ocasión aplicando un proceso máis cómodo e eficiente” á hora de obter o compost para empregar posteriormente en xardíns municipais ou repartilo a quen o solicite para as súas fincas.
A maiores de solventar as dúbidas da veciñanza, tamén se organizou un obradoiro de creación de colectores de pilas para as crianzas e un aperitivo compartido coas persoas asistentes.
A campaña conta co apoio económico do Ministerio para la Transición Ecológica y el Reto Demográfico, a Xunta de Galicia e os fondos NextGeneration da Unión Europea.
