- O próximo acto literario organizarase este venres, 4 de abril, a partir das 19:30 horas, onde Roberto Mera recuperará a extraordinaria odisea de Viana, o seu tío bisavó, nunha Europa ocupada polos nazis e atravesada polos totalitarismos.
- Alejandro Viana Esperón, deputado republicano, foi unha figura fundamental na evacuación de miles de refuxiados que desexaban chegar ata América para salvar as súas vidas, axudándoos coa posta en marcha dunha trintena de expedicións marítimas alén mar.
Un relato de entrega aos demais e toda unha proeza na súa época que salvou vidas: iso é o que agocha o libro de Roberto Mera, galardoado co Premio Antón Losada Diéguez de Investigación 2022, que presentará o venres, 4 de abril, ás 19:30 horas no salón de actos da Alianza Aresana.
‘Alejandro Viana: un galego á fronte do rescate dos refuxiados republicanos’, publicado en Belagua Edicións, supón un exercicio de memoria arredor deste deputado republicano de esquerdas, traendo de volta ó presente a súa labor na Europa ocupada polos nazis.
Alejandro Viana (Ponteareas, 1877- México, 1952) á fronte de varias organizacións humanitarias como o Servicio de Evacuación de Refuxiados Españois, foi o promotor de múltiples expedicións marítimas cara a distintos países de América, axudando a escapar a milleiros de refuxiados que pugnaban por salvar as súas vidas lonxe dos reximes opresivos e antidemocráticos da primeira metade do século XX.
O propio Viana viuse acosado e perseguido pola Falanxe Española e a Gestapo, ata tal punto de acometer unha fuxida desesperada a México, no 1941, coa certeza de que xamais podería retornar á súa terra de orixe e á Ponteares que o viu nacer.
Toda a historia deste home entregado aos demais, tío bisavó do propio escritor Roberto Mera, sairá á luz grazas a esta presentación literaria, na que tamén interveñen Julio Ignacio Iglesias Redondo, alcalde de Ares, e Juan Galán, escritor e investigador na Asociación Memoria Histórica Democrática.
