O certame celebrarase do 7 ao 31 de outubro de 2025 e ofrece a oportunidade de que as fotografías gañadoras formen parte do Calendario Municipal 2026, ademais de optar a premios como unha tablet ou cámara de fotos e lotes de libros.
Haberá dúas categorías de participación, de 8 a 12 anos e 13 a 18 anos, e todas as obras deberán enviarse de forma electrónica a concursofotografia@concellodeares.com.
O concurso ten como obxectivo que a mocidade se exprese a través da fotografía, capturando espazos, lugares, obxectos, festas ou situacións que consideren representativos da súa contorna e da súa identidade, permitindo observar e recoñecerse en pequenas historias e paisaxes vinculadas á memoria colectiva de Ares.
Poden participar mozos e mozas empadroados en Ares ou alumnado do CPI As Mirandas, enviando un máximo de dúas fotografías por participante. As obras deberán incluír os formularios de participación e de identificación cubertos e asinados, dispoñibles en www.concellodeares.gal. No caso de que aparezan terceiras persoas nas imaxes, será necesario achegar tamén a autorización de imaxe asinada por elas.
Técnicamente, as fotografías deben ser JPEG ou JPG, sen edición ou melloras, e cun tamaño de 6 a 12 megapíxeles. Ademais, deben ser orixinais, tomadas ao longo do 2025 e non publicadas previamente.
O xurado designado pola Concellaría de Cultura seleccionará 6 fotografías finalistas (3 por categoría), avaliando creatividade, orixinalidade, representatividade de Ares e cumprimento das bases.
Para máis información ou dúbidas, pódese consultar na OMIX (Edificio Alianza Aresana, Rúa María II, Ares) ou contactar por teléfono no 981 448 057.
