Rafael Catoira, gañador da última edición do Premio Alén de Novela Curta do Concello de Ares, conversará mañá, 4 de novembro, con Alma Barrón, concelleira de Cultura, e Laura Rodríguez, editora de Hércules de Ediciones, arredor da súa novela galardoada ‘Á hora sinalada‘.
O acto de presentación desenvolverase no Espazo Lector Nobel de A Coruña a partir das 19:00 h., e será unha boa oportunidade para achegarse a esta historia narrada en primeira persoa e que afonda na memoria dun home que regresa a Galicia despois de toda unha vida emigrado.
Catoira, empregando unha voz íntima, reconstrúe os espazos físicos e emocionais da súa infancia, os vínculos co país natal e a pegada do tempo transcorrido fóra; unha mirada literaria, en definitiva, sobre a identidade, o desarraigo e o regreso.
Non o perdas!
