Dende as 9:00 ata as 14:00 horas, a Oficina Móbil de Retorno xestionada pola Secretaría Xeral de Emigración chegará á Praza da Constitución de Ares para prestar atención personalizada ós galegos e galegas retornados que decidiron regresar á súa terra e se atopan na actualidade vivindo na contorna municipal ou áreas próximas.
A través da Oficina, preténdese achegar a administración autonómica á cidadanía e poñer a disposición destes colectivos migrantes retornados a información e recursos da Xunta de Galicia. Entre os principais servizos, inclúese o asesoramento sobre programas de apoio ao retorno, orientación laboral –con axudas á hora de validar títulos obtidos no estranxeiro–, asistencia en trámites de Seguridade Social, Sanidade, Educación…
En esencia, un conxunto de servizos de apoio de forma gratuíta cunha atención personalizada para resolver dúbidas, prestar acompañamento e procurar unha orientación de calidade nesta nova etapa vital que se abre co retorno a Galicia despois de emigrar.
