- O salón de actos da Alianza Aresana congrega durante todo o día a expertas no eido xurídico e social para pensar conxuntamente as fórmulas de prevención e os espazos de riscos dos profesionais dos coidados.
- A xornada impulsada polo Concello confórmase de 4 conferencias e 1 mesa redonda e xa acada a súa décimo oitava edición, constatando a súa fonda tradición na vila.
O municipio aresán celebra este 25N, Día Internacional da Eliminación da Violencia contra as Mulleres, cunha ampla xornada que reúne na Alianza Aresana a expertas en materia de igualdade, co foco posto en analizar e debater as contornas de coidados e os seus riscos.
O evento principiou esta mañá coa apertura por parte de María Dolores Castro González, avogada do Centro de Información á Muller (CIM) de Ares, e a traballadora social Patricia Seoane, que agradeceron a involucración de todos os axentes nesta xornada, premiada durante o 2025 no IX Concurso de Boas Prácticas Locais contra a violencia sobre as mulleres da FEMP e que supón “un firme compromiso do Concello fronte a violencia de xénero”.
Baixo o nome ‘Contornas de coidados, espazos de risco: violencia de xénero na práctica profesional’, a iniciativa achegará até Ares a perfís profesionais como traballadoras sociais, asesoras xurídicas, doutoras en socioloxía e xuízas, para realizar unha panorámica de quen, como e en que circunstancias económicas se realizan os coidados no século XXI.
En horario de mañá e de tarde, debatirán e pensarán conxuntamente arredor das 4 charlas e 1 mesa redonda que veñen de deseñar a Concellaría de Igualdade e o Centro de Información á Muller (CIM) municipal.
Entre os principais contidos, farase unha diagnose do traballo dos coidados no contexto galego, reflexionarase sobre os desafíos e as fórmulas de prevención da violencia de xénero e tamén se falará do papel da UFAM (Unidade de Familia e Muller). Unha grella de ponencias que contribúen a analizar unha sociedade marcada polo avellentamento, cuns coidados que recaen na muller e que se prestan en condicións precarias, en moitas circunstancias baixo unha serie de riscos laborais que deveñen en situacións de violencia machista.
Procurarase abranguer así a complexidade que involucra esta problemática social, e materializarase a que é xa a XVIII edición destas xornadas especializadas que se levan desenvolvendo ano tras ano na vila, asumindo un claro compromiso de prevención da violencia contra as mulleres.
