Os actos para celebrar o aniversario da sociedade fundada en 1904 na Habana polos emigrantes da localidade divídense en dúas datas: o venres, 17 de marzo, coa actuación de Isaura & Co, e a propia efeméride oficial de creación, o domingo, 20.
Na programación do 20 de marzo destaca especialmente a entrega do premio que acadou o alumnado e profesorado do CPI As Mirandas no concurso da Deputación da Coruña “Lazos coruñeses con América Latina” cunha investigación sobre a memoria indiana aresá.
Nos próximos días, a localidade de Ares contará cunha dobre celebración: a dos 119 anos da fundación da Alianza Aresana de Instrucción na Habana, a agrupación que foi chave na democratización da educación dentro da vila, e tamén o premio á investigación escolar da Deputación da Coruña que recibiu o alumnado e profesorado do CPI As Mirandas polo traballo “Ares e Cuba, unha historia compartida. A súa pegada indeleble na nosa vila”.
A programación que propón o Concello dende a área de Cultura arranca en realidade o venres, 17 de marzo, coa actuación de Isaura & Co “Claves de bolero” ás 20:00 horas no salón de actos da biblioteca municipal, o mesmo edificio que se construíu grazas ás achegas económicas dos emigrantes galegos do municipio en Cuba.
Continuará xa pasada a fin de semana, o luns 20 de marzo, ao ser o aniversario oficial da Alianza Aresana de Instrucción, unha sociedade que ten as súas fondas raíces no 1904 e que aínda no noso presente é lembrada e homenaxeada.
Abrirá a tarde de conmemoración (19:00 h.) o alcalde de Ares, Julio Ignacio Iglesias Redondo, e seguirá xa a entrega do I Premio Lazos Coruñeses con América Latina, con representantes da Deputación da Coruña, ao grupo de alumnos/as gañadores (Geovanna Carvalho de Medeiros Correia; Luís Alejandro Crespo Oltra; Hugo Martínez Cortizas; Fabio Polo Leira; David Vila Villares; Iván Pena Dovale e Gonzalo Martínez Couce) e á profesora coordinadora, María do Rocío Pena Pena, xunto co equipo de Dinamización Lingüística do colexio.
Tamén haberá oco para ler a acta fundacional da Alianza Aresana (19:15 h.), a que permite entender o espírito da sociedade, marcada polo seu desexo de contribuír á mellora de Ares sufragando a construción da primeira escola da emigración galega, un espazo á vangarda educativa da súa época en toda Galicia.
Pechará o programa dese día unha dobre actuación. Por unha banda, o grupo de teatro A Cova do Trasno interpretará unha peza sobre a propia fundación da Alianza (19:30 h.) e, pola outra, realizarase o espectáculo musical dos Trasnochadores do Eume (20:00 h.).
