A nosa localidade adentrouse nos primeiros compases do mes de setembro movéndose por unha causa solidaria: o apoio á loita contra o cancro, no marco da andaina que promoveu a Xunta local da Asociación Española contra el Cáncer (AECC) en Ares, en colaboración co Concello.
Aproveitando a boa climatoloxía, a veciñanza percorreu onte o paseo marítimo aresán, amais de espazos naturais como a praia de Centeás e o areal da Barrosa nun itinerario de seis quilómetros. Creouse así unha marea verde para amosar o compromiso coa investigación contra o cancro, mais tamén para exemplificar que nin pacientes nin familias están sós na súa loita!
