A programación municipal polo Día de Rosalía chegará mañá, mércores 21 de febreiro, ao salón de actos da Alianza Aresana coa actuación de Antón Ke ás 18:00 horas.
A localidade súmase así á celebración dunha das datas máis sinaladas do calendario cultural galego, a que lembra a pegada da poeta galega na nosa sociedade.
A biblioteca municipal de Ares acollerá mañá, mércores 21, ás 18:00 horas o evento organizado pola Concellaría de Cultura, en colaboración coa Deputación da Coruña, para celebrar o Día de Rosalía 2024. Ata alí se achegará Antón Ke co seu ukelele para interpretar versos musicados de Cantares Galegos, facendo que a música lle dea nova vida a esta obra fundamental no desenvolvemento da cultura galega.
Esta efeméride rosaliana prodúcese cada 23 de febreiro, ao ser o día de nacemento da poeta, despois de múltiples investigacións para esclarecer a xornada exacta na que chegou ao mundo Rosalía de Castro. A celebración serve en última instancia para rendir homenaxe a unha figura central na configuración identitaria de Galicia, unha Rosalía universal e sempre presente a través da súa poesía e prosa.
“Que inchadiña branca vela
antre os millos corre soa,
misteriosa pura estrela!
Dille o vento en torno dela:
«Palomiña, voa!, voa!”
