A biblioteca municipal acolleu a semana pasada a última sesión do seu Club de Lectura, reunindo como cada mes a persoas apaxionadas pola literatura para compartir as súas impresións e reflexións. Nesta ocasión, a obra escollida foi Almendra, da escritora surcoreana Won-Pyung Sohn, unha novela a partes iguais conmovedora e impactante.
Almendra (Temas de hoy, 2020) introduce ao lector na vida de Yunjae, un mozo de 16 anos que, debido a unha condición neurolóxica, é incapaz de sentir emocións. A súa existencia transcorre nun fráxil equilibrio entre a aprendizaxe das expresións alleas e o esforzo por encaixar ata que un tráxico suceso cambia a súa vida por completo. A través das súas personaxes, a historia convida a explorar a empatía, a resiliencia e a capacidade de atopar luz na escuridade.
Unha lectura breve, pero moi intensa, para falar da soidade e o crecemento persoal!
