A semana pasada iniciouse o proxecto de construción do altillo da nave de embarcacións do Club de Remo Ares. Esta intervención supón un paso fundamental na finalización da nova infraestrutura, destinada a cubrir as necesidades de almacenamento das embarcacións de banco fixo e facilitar os entrenamentos do equipo de remo de Ares.
O investimento para realizar estes traballos, que ascende a 36.178,71 euros, materialízase grazas a un convenio entre a Secretaría Xeral para o Deporte e o Concello de Ares. De acordo con este convenio, o organismo autonómico achegará un total de 28.942,97 euros para financiar a construción do altillo, mentres que o importe restante correrá a cargo do ente municipal.
