Lápidas, seres da noite, a Santa Compaña, esqueletos e bruxas… a Praza Alcalde José L. Lourido acolleu un sinfín de aparicións e moito movemento co Samaín que organizou, xunto co Concello, a nova Asociación Cultural O Rueiro.
Entre a diversión e o terror, celebráronse obradoiros de cabazas e zonchos e unha particular rueirada polo camiño escolar até o cemiterio para presentar os respectos aos defuntos. Entre sustos, a comitiva dos mortos voltou á praciña, gozaron do contacontos de ‘Un ollo de vidro’, adaptando o relato de Castelao para os máis pequenos e pequenas, e desfrutaron da música e da troula.
Unha xornada, a vivida o sábado pasado, para toda a familia e na que ninguén quedou sen que lle botasen algunha maldición enriba!
