LIGAZÓN PARA INSCRIBIRSE: https://forms.gle/pXzpi4tsmm3EB4PP7
- Os cantís de Loiba despregaranse ante os participantes que se sumen a este itinerario que principiará preto da vila do Barqueiro. Organizarase o 27 de abril, constará de 12 quilómetros e parte dun prezo de 20 euros por persoa.
- As persoas empadroadas en Ares poderán inscribirse a partir das 14:00 horas deste martes, 1 de abril, na web institucional ata o día seguinte na mesma franxa horaria (14:00 h.), Posteriormente poderán facelo as non-empadroadas na localidade, ata o 14 de abril ás 23:59 h. ou, de darse o caso, o esgotamento dos cupos habilitados.
A Concellaría de Deportes pon en marcha hoxe o proceso administrativo da próxima ruta do SendAres, o programa de sendeirismo do Concello para redescubrir o patrimonio natural galego.
Este martes, 1 de abril, a partir das 14:00 horas e a través da páxina web www.concellodeares.gal abrirase a inscrición telemática para o seu sétimo percorrido ás persoas empadroadas en Ares. Estará operativa ata o día seguinte, 2 de abril, na mesma franxa horaria, momento onde se abrirá a reserva de prazas aos non-empadroados/as no termo municipal.
Este último itinerario da tempada outono-primavera -sen contar a experiencia extraordinaria do SendAres en Asturias- promoverase nunha das contornas naturais máis espectaculares da costa galega: os cantís de Loiba. Partindo dende a praia de Esteiro, preto da carismática vila mariñeira do Barqueiro, camiñarase ao carón do litoral coas súas pedras afuradas polo vento, os areais salvaxes ou as espectaculares furnas, unha paisaxe para non esquecer en moito tempo.
O percorrido desenvolverase ao longo da xornada do domingo, 27 de abril, cunha distancia aproximada de 12 quilómetros e unha dificultade MEDIA. O prezo é de 20 euros e inclúe servizo de guía, transporte e seguros. Saírase ás 8:15 horas en autobús e chegarase á vila de Ares preto das 15:00 horas, tomando como referencia a Praza da Igrexa a modo de punto de encontro.
A Concellaría de Deportes asignou 25 prazas para a actividade que se cubrirán por orde de inscrición, primeiro empadroados/as nunha marxe de 24 horas e posteriormente non-empadradoados/as, ata o 14 de abril ás 23:59 h. ou, de darse o caso, ata o seu esgotamento.
