O Concello de Ares fai un chamamento á veciñanza para secundar a manifestación polo dereito ao tren en toda a comarca convocada para este domingo, 30 de novembro, en Ferrol, por parte do Foro Cidadán Polo Ferrocarril.
Comezará ás 12:00 horas nun percorrido que atravesará a cidade até chegar á Praza de Armas. Entre as reivindicacións, reclámase un tren “adaptado ao século XXI” para toda Ferrolterra, Eume e Ortegal, respondendo ás necesidades de mobilidade da cidadanía, e que conte cun impulso nas infraestruturas ferroviarias, ancoradas no pasado e con acusadas deficiencias.
Ademais, tamén se demandan incrementos nas frecuencias entre Ferrol e A Coruña, facendo que a comarca estea conectada de verdade co Eixo Atlántico e tamén con Madrid, entre outras melloras. Na actualidade, a situación supón unha “discriminación ferroviaria” que require dunha unión transversal de Ferrolterra, Eume e Ortegal para acadar solucións reais.
