- Sesións de memoria, lectoescritura, manexo de smartphones e, coma novidade, o obradoiro ‘a música que nos move’ conformarán esta oferta municipal da Concellaría de Benestar.
- As inscricións abrirán ao longo da vindeira semana e até o 26 de setembro, en horario de 10:00 a 13:00 horas no Departamento de Servizos Sociais sito na Praza da Constitución.
Coa chegada de setembro, volven os principais programas do Concello para dinamizar o novo curso non só para pequenos e familias, senón tamén para maiores. E serán estes últimos o público final de ‘Envellecendo en Ares’, a oferta de actividades que vén de presentar hoxe a Concellaría de Igualdade e Benestar para persoas de máis de 60 anos empadroadas en Ares.
Co obxectivo de fomentar a socialización, o benestar emocional e a aprendizaxe, nesta ocasión serán catro as propostas que integren Envellecendo en Ares de outubro a xuño:
- Obradoiros de memoria, centrados na estimulación cognitiva e o traballo mental, en Ares (os luns, de 12:00 a 13:00 h, amais de 16:30 a 18:00 h. e posteriormente de 18:00 a 19:30 h.), en Cervás (venres, de 17:00 a 18:30 horas) e en Redes, no caso de que exista a posibilidade de crear grupo.
- Lectoescritura, unha oportunidade para mellorar o desenvolvemento e expresión de ideas, pensamentos e emocións, conectando escritura e lectura en Ares, no centro de Servizos Sociais (martes, de 10:30 a 12:00 h.)
- Obradoiro de smartphones, para aprender o emprego do móbil e das aplicacións prácticas do día a día, divididos en 3 grupos na Casa da Xuventude da vila os luns, de 10:15 a 11:45 h, os martes no mesmo horario e os mércores de 12:00 a 13:30 h.
- E as sesións de ‘A música que nos move’, ao longo dos xoves en 3 grupos dunha hora cada un, dende as 16:00 ata as 19:00 h no anexo de Cultura, un espazo onde as melodías, as historias e as emocións convértense en protagonistas. Canto e baile para gozar da música de forma libre.
Todas as actividades, que contan co apoio da Deputación da Coruña no marco da súa liña de loitra contra a soidade non desexada e procura dun envellecemento activo, principiarán dende a primeira semana de outubro até finais de xuño de 2026.
O período de inscrición estará aberto dende o 9 ata o 26 de setembro, en horario de 10:00 a 13:00 horas, no Departamento de Servizos Sociais do Concello situado na Praza da Constitución, cubrindo alí a folla de reserva de praza.
Para solicitar máis información, pódese contactar co 981 448 354.
