A Concellaría de Cultura dirixida por Alma Barrón vén de facer pública toda a programación do Ares Indiano 2024, activando a conta atrás para viaxar ao pasado nesta sétima edición que se producirá o 16, 17 e 18 de agosto.
O Concello despregará nesas xornadas unha oferta lúdico-festiva con multitude de formatos, sempre cun obxectivo claro que afonda nas raíces da celebración: conmemorar a todas aquelas persoas que migraron ás Américas, independentemente do seu éxito económico ou social, e que contribuíron a consolidar a identidade do que é Ares, e tamén Galicia, a día de hoxe.
Entre outras opcións, haberá tres tripoloxías de roteiros (en barco pola ría, en autobús histórico polas parroquias e a pé con Cayetano Lledó, en sesión teatralizada); multitude de obradoiros tematizados, dende pintura caribeña á creación de maracas ou de customización de elementos indianos; clases de baile con ritmos latinos; charlas e faladoiros divulgativos na Alianza Aresana… e moitas outras actividades que crean na vila un ecosistema particular, baseado na memoria e na historia local.
UNHA PROGRAMACIÓN DIVERSA NOS TRES DÍAS DE EVENTO
A programación arrancará xa o venres, 16 de agosto, á tarde coa apertura do Mercado Indiano no paseo marítimo e a exposición da Alianza Aresana que cedeu o Museo Pedagóxico de Galicia (MUPEGA) recreando unha aula dunha escola da emigración. Será logo a quenda de varios pasarrúas e do ‘Romance de Canelo’, unha representación teatral do grupo aresán A Cova do Trasno (21:30 h.).
O sábado, 17 de agosto, dinamizarase a localidade durante todo o día, con roteiros desde media mañá até á tarde e coa inauguración institucional do VII Ares Indiano (11:30 h). Tamén nesta xornada se presentará a nova edición facsimilar que realizou o Concello, ‘39 años de mi vida’ escrito por Canelo (12:15 h.), organizaranse sesións vermú ou espectáculos de maxia e mesmo haberá a oportunidade de ver a un torcedor de puros en directo. E rematarase con música grazas ó concerto de Álex Rodríguez e a súa Salsamanía na Praza da Constitución (22:30 h.)
O domingo, 18 de agosto, continuará o Ares Indiano con máis novidades, como é a acuarela indiana da pintora Blanca Escrigas, que retrará cos seus acrílicos escenas do evento ao longo de gran parte da mañá, ou a presentación literaria de ‘Enfiando a vida’, a novela de Susana Fraguela gañadora do II Concurso Alén de Narrativa Curta (12:00 h.).
De igual xeito, o municipio acollerá a fin de etapa do XXXII Rallie Teresa Herrera de Automóbiles históricos, enchéndose de vehículos de época que logo se desprazarán até Redes, e será o escenario dun dos grandes atractivos musicais desta edición: a cantautora galega SÉS, que pechará o evento indiano coas súas melodías á noite, preto das 22:30 h.
Mais esta será só unha panorámica parcial de toda a diversidade de propostas que se achegarán durante os tres días, unha planificación para que ninguén quede sen lembrar ese pasado de maletas, de buques transoceánicos e de tanto traballo para loitar, en definitiva, por un futuro mellor.
INSCRICIÓNS PARA OS OBRADOIROS DO ARES INDIANO 2024
- Obradoiro de customización de complementos Ares Indiano 2024- Martes 13 de agosto: https://forms.gle/
tk22P6rEgAawRdps8
- Obradoiro de customización de complementos Ares Indiano 2024 – Mércores 14 de agosto: https://forms.gle/
5497QyBnKWraVfUx9
- Obradoiro infantil de pintura caribeña – Obradoiro Mukina Ares Indiano 2024- Domingo 18 de agosto: https://forms.gle/
sZ32zGxX6YepHNL5A
- Procura tesouro indiano Ares – Ares Indiano 2024- Sábado 17 de agosto: https://forms.gle/
ePdFanS7nQpQKPnh8
- Procura tesouro indiano Redes – Ares Indiano 2024- Domingo 18 de agosto: https://forms.gle/
DDUkPWesQDFyWWEF6
- Obradoiro infantil Crea a túa maraca Ares Indiano 2024- Sábado 17 de agosto Grupo I: https://forms.gle/
Vzt83w8Peghdj4tv9
- Obradoiro infantil Crea a túa maraca Ares Indiano 2024- Sábado 17 de agosto Grupo II: https://forms.gle/
1V4vqYWYGqrysgeFA
- Obradoiro infantil Elabora o teu cadro caribeño Ares Indiano 2024- Domingo 18 de agosto Grupo I: https://forms.gle/
HQCYq8o8X4CGqh167
- Obradoiro infantil Elabora o teu cadro caribeño Ares Indiano 2024- Domingo 18 de agosto Grupo II: https://forms.gle/
tdAtrjufRaoDLnSW8
