- O Centro de Información á Muller (CIM) municipal, xunto coa Deputación da Coruña, impulsan esta iniciativa o vindeiro luns, 15 de xuño, de 11:00 a 12:30 h., na Alianza Aresana, con entrada libre.
- Diríxise a un público diverso, dende profesorado a pais e nais, rapazada, grupos de mulleres, entidades sociais… calquera persoa interesada en comprender mellor como operan hoxe os discursos de xénero nas contornas dixitais.
As redes sociais forman parte da nosa vida cotiá: informámonos, comunicámonos, construímos identidade e tamén aprendemos modelos sobre o que significa ser home, ser muller, relacionarse ou ocupar un lugar no mundo.
E precisamente para analizar este fenómeno tan complexo, o CIM de Ares organiza, da man da Deputación da Coruña dentro da campaña DE FRONTE á violencia de xénero, un obradoiro centrado nos discursos sobre feminidade e masculinidade que se reproducen nas redes sociais.
A iniciativa propón así un espazo participativo para pensar os novos discursos, estéticas e referentes dixitais arredor da masculinidade e da feminidade, e reflexionar sobre o impacto que teñen na construción das identidades e na reprodución das violencias machistas.
A través dunha metodoloxía dinámica e accesible, achegaranse ás tendencias e comunidades presentes na contorna dixital actual: desde a chamada manosfera e certas masculinidades reactivas ata novas estéticas femininas como tradwife, that girl ou coquette. Será un xeito de identificar as mensaxes que poden promover unha volta a modelos tradicionais de xénero, reforzar estereotipos ou normalizar formas sutís de control e desigualdade.
A actividade combina pequenas achegas de contido con dinámicas de reflexión individual e colectiva, xogos e propostas creativas. O obxectivo é xerar un espazo coidado no que recoñecer estes discursos, poñelos en diálogo coa experiencia cotiá e fortalecer unha mirada crítica, igualitaria e libre de violencias.
O obradoiro está dirixido a públicos diversos: profesorado, ANPAS, rapaces e rapazas a partir de 13 anos, asociacións feministas, grupos de mulleres, entidades sociais, persoal técnico e calquera persoa interesada en comprender mellor como operan hoxe os discursos de xénero nas contornas dixitais.
Esta proposta enmárcase na campaña DE FRONTE á violencia de xénero, o programa de actividades impulsado pola Área de Igualdade da Deputación da Coruña para desenvolver accións de sensibilización e prevención das violencias machistas, promovendo a implicación dos concellos e do tecido social e asociativo da provincia.
