O Concello, a través da Policía Local da vila, promoveu esta mañá unha charla informativa dirixida aos propietarios de establecementos de hostalería para abordar diferentes cuestións relacionadas coa campaña estival e facilitar o desenvolvemento da súa actividade durante os vindeiros meses.
Durante o encontro, os axentes tanto da Policía Local de Ares como da Garda Civil presentes no salón de actos da Alianza Aresana explicaron nocións prácticas para os hostaleiros, así como a normativa aplicable ás terrazas, os horarios, a celebración de concertos e espectáculos ou a cartelería obrigatoria relacionada coa protección das persoas menores de idade.
A sesión serviu tamén para resolver dúbidas e intercambiar impresións cos profesionais do sector, reforzando a colaboración entre administración e hostalería de cara a unha temporada de verán máis segura.
Á xornada asistiu tamén a concelleira de Comercio, Lucía Blanco, que acompañou ao persoal da Policía Local. A iniciativa desenvolveuse de maneira coordinada coa Policía Local e a Garda Civil de Mugardos, que celebraron igualmente unha sesión informativa semellante no municipio veciño.
