A 18ª edición do Campus Chiquibasket, impulsado por Chiqui Barros e o Concello de Ares, concluíu o pasado venres no Pavillón Polideportivo Municipal, que durante toda unha semana se converteu nun centro de adestramento, aprendizaxe e diversión arredor do baloncesto.
Máis de 30 rapazas e rapaces participaron nesta nova edición, na que tiveron a oportunidade de desfrutar do seu deporte favorito, perfeccionar a súa técnica e compartir unha semana de convivencia e aprendizaxe a través do baloncesto.
O pasado venres celebrouse no propio pavillón o acto oficial de clausura, no que participaron os promotores do Campus e a concelleira de Deportes, Alma Barrón, poñendo o peche a unha nova edición desta iniciativa deportiva xa consolidada no calendario estival de Ares.
Ao longo da semana, as e os participantes combinaron os adestramentos e a mellora das súas habilidades deportivas con momentos de convivencia e lecer, permitindo tamén coñecer e desfrutar da vila de Ares máis aló das instalacións deportivas.
O Campus Chiquibasket constitúe así unha proposta que vai máis alá da práctica deportiva, fomentando entre as e os máis novos valores como o compañeirismo, o traballo en equipo, o esforzo e a convivencia, nun ambiente pensado para aprender e desfrutar do baloncesto.
Desde o Concello de Ares agradecen a participación de todas as rapazas e rapaces e o traballo desenvolvido durante estes días, así como a implicación de Chiqui Barros e de todo o equipo do Campus, que fan posible que esta iniciativa continúe medrando ano tras ano.
