Estará dispoñible ata o 25 de setembro, de luns a venres, de 9:00 a 14:00 horas.
A Alianza Aresana acolle dende hoxe, venres, 9, ata o 25 de setembro a exposición “Nós somos elas”, unha iniciativa que se materializa na localidade grazas á colaboración da Concellaría de Igualdade e Benestar e á Deputación da Coruña, que a cede.
“Nós somos elas” está integrada por máis de vinte fotografías que poñen o foco na figura das mulleres, retratadas nun contexto privado e laboral e inmersas no mundo rural ou mariñeiro. A mostra constrúe así un relato colectivo a través das instantáneas seleccionadas do Arquivo Fotográfico Vidal, dentro da colección permanente do Museo do Mar de Laxe, sempre co desexo de visibilizar o rol destas mulleres na sociedade da súa época.
Mais a exposición non só conta con fotografía, senón que inclúe creacións poéticas para poñer en relación o texto e a imaxe. Estas creacións proceden das mans de autoras contemporáneas coma Berta Dávila, Ana Romaní, Lucía Aldao ou Mercedes Queixas e achegan as súas visións particulares sobre a temática.
A mostra poderá visitarse de luns a venres, de 9:00 a 14:00, no que é o horario actual de apertura da biblioteca municipal de Ares.
