A entidade que agrupa aos principais axentes relacionados coa promoción de hábitos saudables en Ares, a Mesa de Saúde Local, reuniuse de novo na tarde de onte para abordar novas análises e propostas neste eido que é chave no día a día da veciñanza.
Nas instalacións da Alianza Aresana, a sesión actuou coma un punto para realizar un repaso de accións executadas até o de agora en materia de xestión emocional no municipio, revisando o estado actual da materia dende diferentes perspectivas: social, deportiva, psicolóxica…
Entre os asistentes consensuouse crear unha liña de traballo coas entidades deportivas que conten con adestradores de pequenos e pequenas, para obter información cualitativa sobre como se achegan á xestión emocional en idades tempranas, sabendo que é fundamental no benestar das persoas.
A reunión contou coa presenza da edila de Benestar, Victoria Montenegro, e foi dirixida pola Rede Galega de Promoción da Saúde da Área Sanitaria de Ferrol (REGAPS).
