O equipo actoral de Gallaecia Eventos achegouse este sábado pasado até Ares para contar, fusionando danza, música e poesía, un relato que resoa na memoria colectiva da vila: aquela que fala de tantas persoas que emigraron na procura dun futuro mellor.
O espectáculo ‘Na Cerna do Son’ debullou unha travesía que uniu Galicia e Latinoamérica a través de melodías tradicionais alén mar, mais tamén cantos de traballo e alalás.
Co talento de Cristian Leggiero ao piano, Paty Lesta como cantante, Moisés Fernández no caixón flamenco, Ricardo Fernández como bailarín, Luis Iglesias dende a narración e Iván Villar na dirección escénica, no Casino Aresano viviuse unha viaxe emocional arredor do proceso migratorio entre ambas beiras do Atlántico.
O acto, programado pola Concellaría de Cultura, contou coa colaboración da Deputación da Coruña, dentro do seu programa Outono das Artes, e do Casino.
