A intervención reformará un edificio histórico dentro do casco urbano de Ares, inaugurado en 1955 baixo deseño do arquitecto Rodolfo Ucha e construído grazas ás achegas da Alianza Aresana de Instrucción.
As empresas interesadas poderán presentar as súas ofertas ata o 28 de novembro. O importe das obras será de 273.073,06 € con cargo ao Fondo de Cooperación para concellos do Instituto Galego da Vivenda e Solo (IGVS).
A Concellaría de Urbanismo vén de informar da licitación dos traballos que rehabilitarán as Escolas do Lago, un ambicioso proxecto de reforma que mellorará notablemente a infraestrutura deste espazo fundamental na historia de Ares pola súa orixe indiana.
Inaugurado en 1955 cun deseño de Rodolfo Ucha, a rehabilitación proxecta manter o emprego actual do edificio coma lugar de apoio aos usos sociocomunitarios (reunións, charlas, obradoiros, etc.). Manterase a volumetría e a orixe arquitectónica da edificación, respectando a distribución da escola no pasado, cunha división en dúas salas para impartir as diferentes sesións educativas (unha destinada ós nenos e outra ás nenas) e un corpo de aseos que daba ao patio da parcela.
A intervención conta cun orzamento de 273.073,06 € asumido polo Fondo de Cooperación para Concellos do Instituto Galego da Vivenda e Solo (IGVS), grazas a que Ares foi un dos 9 concellos de toda Galicia cuxos proxectos resultaron beneficarios deste instrumento que a Xunta pon á disposición das administración locais.
Segundo a información proporcionada polo Concello, acometaranse melloras na cuberta, a tabiquería interior, os falsos teitos, a fontanería, aseos, pavimentos, electricidade, pinturas, sistema de calefacción… En definitiva, a actuación traducirase nunha renovación integral, de igual maneira que xa se realizou anteriormente no segundo edificio que conforma a manzana das Escolas do Lago e que se atopa separado do primeiro, o situado ao este en dirección á rúa Real, pola praza central aberta ou patio.
O prazo de presentación de ofertas por parte das empresas interesadas estará aberto ata o 28 de novembro, con toda a documentación xa dispoñible na Plataforma de Contratación do Sector Público.
