- Veñen de arrancar uns traballos centrados na execución dun novo sistema de drenaxe transversal, a instalación dunha barreira rústica para protección peonil e a reconstrución do firme mediante unha solución integrada paisaxisticamente na súa contorna.
- A actuación conta cun orzamento de 48.400 euros aproximadamente, co apoio económico da Deputación da Coruña.
A Concellaría de Urbanismo vén de informar do comezo da mellora das comunicacións no vial histórico que se estende entre o Castelo da Palma e as antigas baterías militares que se situaban nas proximidades de Punta San Martiño.
Trátase, en esencia, dun proxecto destinado a recuperar as condicións de seguridade dun itinerario patrimonial e paisaxístico moi transitado tanto por veciñanza coma por visitantes e sendeiristas.
A intervención contempla, ademais das necesarias rozas e retiradas de vexetación, a execución dun novo sistema de drenaxe transversal mediante un paso salvacunetas, a instalación dunha barreira rústica de protección lateral integrada na paisaxe, de cara a evitar caídas cara ás cotas inferiores do litoral, e a reconstrución do firme, moi deteriorado, empregando unha base compactada, xeotéxtil e cun pavimento terrizo de xabre granítico e cemento.
Este conxunto de actuacións impactarán nun treito de 75 metros de lonxitude con áreas erosionadas, acumulación de sedimentos, problemas de drenaxe e presenza de lameiros, de tal xeito que se porán fin a estas problemáticas para garantir unha mellora do tránsito peonil e do acceso de vehículos de mantemento ou de emerxencias, de precisarse.
Con todo, o proxecto en si mantén solucións que respectan o valor patrimonial e ambiental deste vial de carácter histórico, que forma parte do sistema defensivo da ría de Ferrol coñecido como o ‘Triángulo de fogo’, servindo de conexión entre postos de vixilancia, fortificacións e elementos militares da costa. Por iso mesmo os traballos evitan solucións asfaltadas ou urbanas, co foco posto en manter unha estética máis integrada paisaxisticamente.
A concelleira de Urbanismo, Olimpia Marcos, salientou que “esta nova intervención se suma a outras xa materializadas en eidos semellantes, impulsando a comunicación viaria e os accesos: melloramos a subida dende o convento de Santa Catalina ás baterías da Bailadora e tamén dende o camiño de Salgueiras ata as do Segaño, facendo realidade actuacións centradas na dignificación deste patrimonio de orixe militar”.
O investimento previsto ascende a 48.400 euros, impostos incluídos, co apoio financeiro da Deputación da Coruña.
