- O 25 de novembro, Día Internacional da Eliminación da Violencia contra as Mulleres, a Alianza Aresana será epicentro dun conxunto de conferencias e mesas redondas con expertas de diferentes eidos, dende o traballo social até o enfoque máis xurídico.
- 4 conferencias e 1 mesa redonda compoñen o programa desta iniciativa, que recibe o nome de “Contornas de coidado, espazos de risco: violencia de xénero na práctica profesional”, e foi premiada este mesmo 2025 no IX Concurso de Boas Prácticas Locais contra a violencia sobre as mulleres da FEMP.
Ares transformarase un ano máis nun espazo para o diálogo e a reflexión arredor da violencia de xénero, e será grazas á organización da xornada ‘Contornas de coidados, espazos de risco: violencia de xénero na práctica profesional’ que promoven a Concellaría de Igualdade e o Centro de Información á Muller (CIM) municipal.
Esta iniciativa volve un ano máis ao municipio para traer á Alianza Aresana a expertas e expertos centrados nesta temática social con 4 charlas e 1 mesa redonda ao longo do 25 de novembro, coincidindo coa conmemoración do Día Internacional da Eliminación da Violencia contra as Mulleres.
Hoxe mesmo fíxose público todo o programa desta xornada, no marco do acto de presentación realizado esta mañá no consistorio de Ares e que contou coa presenza de Victoria Montenegro, concelleira de Igualdade e Benestar, e das súas compañeiras do equipo de goberno, as edís Lucía Blanco e Olimpia Marcos.
Dende o Concello enfatizaron a relevancia de contar cun evento “con capacidade de analizar unha problemática tan relevante para a nosa sociedade coa fondura que precisa”. Desta volta a xornada divulgativa achegará unha visión sobre o traballo dos coidados no contexto galego, aplicando una panorámica sobre os seus espazos de risco, mais sen esquecer as ferramentas e mecanismos de prevención da violencia de xénero.
Así, perfís profesionais como traballadoras sociais, expertas en igualdade, asesoras xurídicas, doutoras en socioloxía e mesmo xuízas pensarán conxuntamente a situación actual da violencia de xénero tanto de mañá como de tarde.
O programa principiará a partir das 10:30 h., coa inauguración instituconal, e a asistencia é totalmente de balde; só precisará inscrición previa para facilitar a organización e loxística vía telemática na seguinte ligazón: https://gplus.typeform.com/to/YG8RMBUN.
Esta xornada impulsada polo Concello de Ares recibiu o Premio ao Impulso á formación de diferentes axentes no IX Concurso de Boas Prácticas Locais contra a violencia sobre as mulleres da FEMP e a Delegación do Goberno de España.
