- Ao longo da xornada do 16 de xaneiro, a vila contará cun obradoiro centrado en almorzos e merendas saudables e unha charla divulgativa sobre a xestión da diabetes hoxe en día.
- Ambas iniciativas contan coa colaboración da Asociación de Diabéticos de Ferrolterra.
O programa municipal centrado na divulgación de hábitos saudables entre a veciñanza, a Academia AresXSaúde, encara a súa actividade de xaneiro ofrecendo dúas sesións co foco posto na nutrición durante a tarde do venres, 16.
A primeira delas, Almorzos e merendas saudables, realizarase no Club Náutico de Ares ás 17:00 h. baixo o formato de obradoiro práctico impartido por Eva Pazos, profesora na escola gastronómica Oído Cociña. Entre os contidos, divulgaranse 3 receitas fáciles e prácticas tanto para o almorzo como para a merenda, tendo en conta a posibilidade de reducir ingredientes como o azucre.
Despois, preto das 19:00 h., a Alianza Aresana acollerá a charla ‘A xestión da diabetes hoxe en día’, onde se debullará como convivir e coñecer o día a día desta doenza metabólica na cotiandade coa axente educativa pola Federación Española de Diabetes, Azucena Fernández.
O obradoiro precisa de inscrición previa no Departamento de Servizos Sociais ou no teléfono 981 448 354, namentres que a charla divulgativa é de entrada libre até completar aforo no salón de actos da Alianza. En ambos casos cóntase coa colaboración fundamental da Asociación de Diabéticos de Ferrolterra.
