Estes días, o tenis de mesa serviu como punto de encontro entre o estudantado de Ares e Mugardos. Rapazada de diferentes centros educativos da contorna compartiron varias xornadas pensadas para aprender co deporte, divertirse e convivir a través do ping-pong.
Ao longo do pasado luns e neste mesmo mércores, alumnos e alumnas de Primaria do CPI As Mirandas, do CEIP Santiago Apóstol de Franza e da Unión Mugardesa colleron as raquetas de tenis de mesa no pavillón polideportivo aresán para xogar xuntos e, xa de paso, coñecer a compañeiros doutro concello.
Unha xornada de intercambio entre escolares para fomentar valores e tender pontes dende idades temperás, organizada pola Escola Municipal de Tenis de Mesa de Ares –baixo a coordinación do club Cidade de Narón— e inscrita no programa XOGADE da Secretaría Xeral do Deporte.
