O equipo de produción despídese hoxe da vila aresán coa última gravación audiovisual que realizarán no municipio.
Luces, cámara e acción! Son estas as frases que se repiten ao longo da xornada deste luns, 5 de febreiro, por mor da rodaxe da serie Saudade de Ti da TVG en Ares.
O equipo técnico e artístico regresou ao municipio para gravar varias secuencias da súa terceira tempada, facendo que sexa xa unha paisaxe cotián dentro da serie. O trasfego de produtores, directores e actores puido verse pola mañá en diferentes localidades aresáns, coma o paseo marítimo ou os arredores do mercado municipal, e pola tarde na contorna do Porto. Algúns destes espazos, de feito, xa foron protagonistas nas tres xornadas de gravación de Saudade de Ti que presenciou a vila.
Así, o ambiente mariñeiro de Ares tamén deixou a súa impronta na configuración estética da serie da Televisión de Galicia!
