Esmelle e o mirador de Pedrouzo serán os espazos centrais desta actividade programada para o 13 de novembro e que aúna sendeirismo e coñecemento do medio natural.
As persoas interesadas poderán inscribirse dende mañá, 18 de outubro, ás 18:00 horas ata o 1 de novembro, con 25 prazas asignadas e un prezo de 15 euros.
O SendAres, a programación municipal que conecta a exploración do patrimonio natural galego coa práctica deportiva, vén de anunciar a posta en marcha da súa segunda ruta, desta volta achegándose ós Muíños de Esmelle e o mirador de Pedrouzo na xornada do 13 de novembro. Segundo a información aportada polo Concello, o proceso de inscrición abrirá mañá, 18 de outubro ás 18:00 horas, cun trámite telemático a través da nova páxina web municipal (www.concellodeares.gal).
Neste segundo itinerario, os sendeiristas descubrirán o pequeño val conformado por varios regatos nos que se sitúa Esmelle e que desemboca na praia homónima, un dos areais máis impresionantes de Ferrolterra. Durante os 11 quilómetros de percorrido, haberá tempo para acceder a un antiguo búnker das baterías de costa do Golfo Ártabro, xusto no mirador de Pedrouzo, antes de encarar o camino de volta nunha ruta de dificultade media-baixa.
A actividade terá un prezo de 15 euros, no que está incluido o servizo de guía e tamén o desprazamento en autobús, que sairá as 8:00 horas de Ares e regresará preto das 14:00 horas ao punto de encontro habilitado: a Praza da Igrexa da localidade.
Para esta segunda ruta, a Concellaría de Deportes asignou unhas 25 prazas, que se cubrirán por orde de inscrición ata as 15:00 horas do 1 de novembro ou, de darse o caso, ata o seu esgotamento.
FORMULARIO DE INSCRICIÓN: Ruta 2: Muíños de Esmelle e mirador de Pedrouzo
