A riqueza paisaxística de Ares despregarase na próxima mostra pictórica que se organizará nas instalacións da Casa da Xuventude da localidade, xa ao longo deste mes de agosto. Será a través da obra de José Antonio Porro, coa súa exposición “Paisajes y Marinas de Ares” dispoñible dende este mércores, 3, ata o 18.
José Antonio Porro, amais de pintor, é tamén docente na escola de pintura Mukina, con obradoiros en Ares, Pontevedra ou A Coruña de paisaxe para adultos ou de técnicas pictóricas para nenos e nenas. A través da mostra que desembarca o mércores, Porro amosará a súa mirada sobre o eido litoral máis próximo ó municipio, con importancia do mar e os elementos que configuran a paisaxe local.
A exposición poderá visitarse de luns a venres, de 9:00 a 14:00 e de 20:00 a 22:00 horas, e tamén os sábados, en horario de mañá, de 12:00 a 14:00, no piso superior da Casa da Xuventude.
