O Concello licita a adquisición dun vehículo que fará de punto limpo móbil na localidade

Comparte esta nota de prensa

Suporá un investimento de case 86.000 euros, a través dunha subvención da Xunta con fondos NextGeneration da Unión Europea, e mellorará o servizo de tratamento dos residuos, achegándoo máis directamente á veciñanza.

O vehículo permitirá recoller residuos especiais coma pequenos electrodomésticos, pilas e baterías, lámpadas, calzado, roupa ou aceites minerais e vexetais.

O Concello vén de informar da licitación do subministro dun punto limpo móbil, incluíndo un camión-guindastre, esta mesma semana, tras a publicación do anuncio na plataforma de contratación do sector público. As empresas interesadas terán ata o 26 de setembro para presentar as ofertas, de cara a reforzar o servizo de recollida de residuos existente na actualidade en Ares.

A través desta acción, a localidade aresá contará cun novo equipo que achegará maior versatilidade, ao poder trasladar o tratamento de residuos especiais ás parroquias ou colocalo en determinados eventos e/ou actividades de especial interese. O punto limpo móbil terá seis contedores nos que depositar, principalmente:

• Pilas e baterías
• Lámpadas e tubos fluorescentes
• Aceites minerais
• Aceites vexetais
• Pequenos electrodomésticos
• Roupa e calzado

Incrementarase así a tipoloxía de obxectos e residuos a recoller que existe na actualidade, reforzando o servizo municipal en xeral, e sobre todo permitirá cambiar cada certo tempo o lugar onde se estableza o punto limpo móbil, informando á veciñanza previamente do troco.

Segundo os pregos técnicos, o vehículo que fará de punto limpo móbil suporá un investimento de 85.910 euros, impostos incluídos, recibidos a través dunha liña de subvención da Xunta de Galicia cofinanciada polo fondo europeo relativo ao Mecanismo de Recuperación e Resiliencia, con cargo á Unión Europea-NextGeneration.

En última instancia, o subministro do punto móbil está en consonancia coas dinámicas de corresponsabilidade actuais, na que tanto institucións coma ciudadanía xogan un papel fundamental na procura dunha economía circular e de prácticas que promovan a mitigación do cambio climático.

 

Pódeche interesar