A Concellaría de Cultura vén de informar da apertura de recepción de obras para o XV Manuel Rebón, o concurso de pintura organizado xunto ao CIRS de Cervás. Así, as persoas interesadas poderán depositar os cadros que concorrerán no certame dende mañá, 1 de setembro, ata o venres, 9 (ambos incluídos), no propio Local Social do CIRS, baixo un horario de luns a venres, de 19:00 a 21:00 horas, e sábados e domingos de 12:00 a 14:00 e 19:00 e 21:00.
As obras, de temática libre e realizadas con técnica de óleo ou acrílico, deberán contar cun tamaño próximo aos 110×110 centímetros, contando co propio marco da composición. Os cadros deberán estar xa enmarcados ou acondicionados para a súa exposición -é dicir, rematadas polos bordos-.
Despois da recepción de obras, o xurado, composto por persoas vencelladas co eido cultural, desvelarán o fallo o martes, 13 de setembro. Para o primeiro premio entregaranse 1.400 euros; 500 euros para o mellor pintor local e, logo, 300 euros divididos en dous accésits (150 cada un).
Finalmente, a exposición coas obras presentadas abrirase do 15 ao 25 deste mes nas propias instalacións do CIRS.
