O 10 e 11 de maio o programa municipal de sendeirismo traslada a súa actividade fóra de Galicia para explorar o Porto de Tarna, dentro do Parque Natural de Redes, e o Pico Gilbo, ambos lugares en Asturias.
A área de Deportes abrirá inscricións para empadroados/as o 13 de marzo ás 18:00 horas ata o día seguinte, na mesma franxa horaria, onde poderán sumarse os non-empadroados/as.
A Concellaría de Deportes vén de anunciar un roteiro extraordinario para o mes de maio que levará aos participantes do SendAres, o programa municipal de sendeirismo, ata Asturias. Será durante a fin de semana do sábado, 10, e domingo, 11 de maio.
Para sumarse á iniciativa, a área de Deportes abrirá este 13 de marzo ás 18:00 horas o proceso de inscrición telemática no sitio web institucional, www.concellodeares.gal para os empadroados/as e o 14 de marzo, na mesma franxa horaria, aos non-empadroados/as.
Na ruta deseñada polo Concello establecéronse dous itinerarios, un por día, para afondar na natureza asturiana do mellor xeito: a través do sendeirismo.
A xornada do 10 de maio estará protagonizada pola Travesía Tarna-La Uña, un percorrido de 11 quilómetros para os amantes das actividades de montaña que entrará e sairá polos territorios do Parque Natural de Redes, Reserva da Biosfera dende o 2001. Polos seus camiños poderanse contemplar restos de fortificacións defensivas construidas polo bando republicano na súa resistencia contra as tropas franquistas, conectando así os ecos da historia coa natureza e facendo dos pasos de montaña desta cordilleira enclaves de enorme valor.
Ao día seguinte, o 11 de maio, poñeranse pés e miradas sobre o monumental Pico Gilbo, na montaña Oriental Leonesa, unha das súas cimas máis características Aproveitando a climatoloxía da primavera, os sendeiristas poderán ascender esta mole piramidal de pedra caliza pola súa cara norte, superando as pendentes e os fermosos faiais ao longo dos 9 quilómetros de itinerario.
O prezo para toda a experiencia lúdico deportiva de fin de semana é de 130 euros, incluíndo os servizos de guía, transporte e seguros, amais do aloxamento dunha noite no albergue de Maraña (con almorzo e enseres para a pernocta como nórdico, sábanas e funda de almofada). O autobús partirá o sábado, 10 de maio, ás 05:30 h. da Praza da Igrexa de Ares e chegará á localidade o día seguinte preto das 20:30 h.
A Concellaría de Deportes habilitou 23 prazas para a actividade, que se cubrirán por orde de inscrición seguindo os prazos establecidos: primeiro empadroados e, posteriormente, dende o 14 de marzo ás 18:00 horas en adiante, os non empadroados.
LIGAZÓN PARA INSCRIBIRSE: https://forms.gle/7kmmkj1vchjtV6SP8
