- A primeira sesión desta iniciativa impulsada polo Centro de Información á Muller (CIM) da vila, xunto coa Concellaría de Igualdade e Benestar, vén de realizarse esta mañá no municipio cun grupo de 16 participantes.
- O foco dos obradoiros, que terán continuidade con cinco sesións máis, porase no autocoidado de quen coida, un perfil claramente feminizado e con problemáticas transversais. Aprenderán sobre relaxación, límites saudables ou xestión da culpa, entre outras cuestións.
Como aprender a coidarse a unha mesma cando tamén se coida doutra persoa dependente? Esa é a pregunta fundamental que se responderá ao longo das 6 sesións que conforman o obradoiro proposto polo CIM de Ares e a Concellaría de Benestar; un xeito de traballar con aquelas mulleres —pois os coidados son unha responsabilidade que recae, practicamente na súa totalidade, nelas—que son ou foron coidadoras.
Esta mesma mañá, o Centro de Recreo e Actividades Culturais do Concello acolleu a primeira destas sesións que poñen o foco en múltiples pautas que contribúen a unha mellora da saúde mental.
Alí, as case vinte participantes da iniciativa, que conta coa colaboración da Fundación Mulleres e o financiamento da Deputación da Coruña, entraron en contacto entre si para coñecerse e, sobre todo, para afondar no contexto dos propios coidados na sociedade contemporánea.
A propia concelleira de Igualdade e Benestar, Victoria Montenegro, deulles a benvida xunto coa directora do CIM aresá, Laura Toimil, e enfatizou a relevancia de “construír entre todas un espazo onde teñan un tempo para elas, para parar e para tratarse ben”, en palabras da edila.
E esa é a máxima detrás do obradoiro: facer das sesións, que se producirán cada xoves até o 18 de xuño en horario de mañá, un lugar onde poidan aprender os “pilares do benestar e autocoidado”.
A monitora e encargada de coordinar a actividade, Bárbara González, da Fundación Mulleres, tamén fixo fincapé nun dos obxectivos do programa: que “poidan aprender a tratarse con amabilidade, a poñer límites, a relaxarse… mais sobre todo a que o seu diálogo interno sexa máis compasivo. A autocompasión é chave para este autocoidado”.
Dende agora en adiante, afondarán en cuestión como o mindfulness, as fórmulas para xestionar a culpa interna que se autoimpoñen ou como poñer límites saudables e sólidos.
Un conxunto de obradoiros totalmente de balde destinados, en esencia, a mellorar a calidade de vida de todas aquelas coidadoras ou excoidadoras de persoas dependentes.
