Onte o Casino Aresano transformouse en sede efémera do VIII Torneo de Xadrez Concello de Ares, un evento que recupera as dinámicas e sinerxias do pasado, pois a localidade tivo anos atrás unha competición estable semellante a ésta, promovida neste 2024 pola Escola de Xadrez da Galicia Norte, en colaboración coa Escola Ferrolá de Xadrez e co patrocinio da Concellaría de Deportes.
Preto de 40 axedrecistas achegáronse en horario de mañá e de tarde para desputar as partidas baixo un ritmo de xogo de 20 minutos por deportista baixo a modalidade coñecida como ‘suíza’. Houbo rostros de concentración, silencio e un bo percorrido de taboleiros de xadrez para que os espectadores tamén puideran seguir de preto o desenvolvemento dos diferentes xogos.
Ás xornadas acudiu Alma Barrón, concelleira de Deportes, e formalizou a entrega dos galardóns para os tres primeiros clasificados nas diferentes categorías do torneo, marcadas pola amplitude dos rangos de idade. Houbo 21 trofeos a repartir entre os sénior, veterán (+ 60 anos), sub-18 anos, sub-16 anos, sub-14 anos, sub-12 anos e sub-10. O evento, de feito, tivo carácter oficial: os resultados son válidos para sumar no ránking nacional ou internacional dos axedrecistas.
Dende a Concellaría de Deportes agredeceron a involucración do Casino Aresano para prestarse como sede da iniciativa, mais tamén o traballo coordinado das dúas escolas de xadrez da comarca que materializaron o evento, co desexo de que a veciñanza estableza vínculos entre si arredor deste deporte mental común que os une.
