Arrancan os traballos que permitirán contar cunha área de calistenia no parque Rosalía

Comparte esta nota de prensa

Share on facebook
Share on linkedin
Share on twitter
Share on email

Tras a instalación, a veciñanza poderá desfrutar dunha infraestrutura para a práctica deportiva ó aire libre, atendendo  unha demanda constante por parte dos deportistas locais.

Nestes últimos días, a Concellaría de Deportes vén de informar do inicio das obras relacionadas co parque de calistenia que adquiriu a institución local, unha estrutura que se está instalando nas inmediacións do Parque Rosalía composta por un conxunto de barras para realizar movementos e repeticións. A área de calistenia é fundamental para traballar co corpo e fornecer as extremidades, ombros e costas, e ademais complementará a actual oferta de infraestrutura biosaúdable do municipio.

Este primeiro parque de calistenia de Ares permitirá exercitarse co emprego do propio corpo sen importar idade e estado de forma, sempre e cando se realice unha correcta rutina de exercicios. Entre os seus principais beneficios, destaca a mellora da flexibilidade, a obtención de maior forza funcional e a posibilidade de contrarrestar desequilibrios musculares.

Unha aposta continua polo deporte ao aire libre

Asimesmo, a incorporación desta infraestrutura pública tamén responde ó interese do goberno municipal de achegar o maior número de espazos de deporte ó aire libre a todos os puntos de Ares, tanto no núcleo urbano da vila coma no conxunto das parroquias.

O esforzo continuo vén materializándose nos últimos anos coa paulatina instalación de parques biosaúdables na contorna municipal, ata acadar as 8 áreas destinadas a tal uso e ás que se suma na actualidade o novo espazo que incorpora o parque de calistenia.

Pódeche interesar