Cun investimento de 195.000 euros, esta actuación busca intervir no edificio de vestiarios para mellorar tanto a eficiencia enerxética da súa estrutura como das súas instalacións.
O proxecto será levado a cabo mediante unha subvención solicitada ao Fondo de Cooperación Local da Xunta, así como con fondos municipais.
As melloras incluirán diversas accións, como a substitución da actual cuberta de fibrocemento por paneis sándwich de aceiro lacado con illamento térmico, o revestimento das fachadas cun sistema SATE con acabado hidrofugante e illante, e a substitución das xanelas e portas actuais por outras con mellores características de illamento térmico.
Adicionalmente, instalarase unha batería de paneis solares térmicos e un intercambiador de auga quente sanitaria cunha achega do 60%.
Estas medidas permitirán modernizar e optimizar o Campo de Fútbol de Prados Vellos, proporcionando unhas instalacións deportivas enerxéticamente eficientes e adecuadas.
O proxecto xa foi publicado na Plataforma de Contratación do Sector Público, e as empresas interesadas poderán presentar as súas ofertas ata o 5 de xullo.
