Un evento que achegou culturas e historias de migración; que serviu para conectar tradicións e xentes e que contou con música, danza, gastronomía e charlas!
Ao acto asistiron as concelleiras Victoria Montenegro, de Igualdade e Benestar, e Lucía Blanco, da área de Turismo. No inicio desta I Ollada Migrante, Victoria Montenegro invitou a enfocar a cuestión da migración “non dende os tecnicismos, senón dende os sentimentos; sobre todo, os sentimentos de perda ao deixar aos fillos, aos pais, á familia… e chegar aquí coa ilusión de conseguir o que non tiñan nos seus países de orixe”.
“Dentro dos Servizos Sociais, abrimos as portas coma podemos, mais contamos coa colaboración do Patronato Concepción Arenal e Cáritas, e sen eles non poderíamos aguantar todas as responsabilidades”, finalizou a concelleira de Igualdade e Benestar.
Nesta primeira edición, a vicepresidenta do Patronato, Conchi Ramil, afondou nos obxectivos e trasfondo da iniciativa: “a diversidade cultural está moi presente en Ares, e por iso desexamos dar a coñecer a integración doutras culturas na nosa localidade; coñecer como é a súa adaptación na vila”. No día de onte, pola Alianza Aresana emerxeron precisamente testemuñas dese crisol de culturas que habita no municipio e que expón parte da súa riqueza.
Aquí atoparás algunhas das instantáneas que nos deixou a xornada!
